தமில் வாள்க! - ஸ்ருதி!

ஸ்ருதி? ஸ்ருதி சுருதி தானே சரியான தமிழ்?  

ஆரம்பத்தில எனக்கு ஒண்ணுமே தோணல! ஆனாலும் எங்க தலைவரோட பொண்ணுன்னு ஒரு 'இது' இருந்திச்சு! அப்புறமா ஸ்டில்ஸ் பார்த்தப்போ பிடிச்சிருந்திச்சு! ஆனா ஏழாம் அறிவு பார்த்ததும்...

'உன் காதலைத் தூக்கிக் குப்பைல போடு!'

எனக்கு அதிர்ச்சியாயிடுச்சு! சூர்யா லவ் பண்ணாரா? சொல்லவேயில்ல?

படம் தொடங்கி ஒரு கனவுல டூயட் பாடிஇருந்தாலும் கூட நம்ப முடியவில்லை! இதே அதிர்ச்சி எல்லாருக்கும் இருந்திருக்கும்! ஏன் முதன்முதல் படம் பார்க்கும்போது சூர்யாவுக்கே கூட இருந்திருக்கலாம்!

ஆனா பாருங்க நம்ம சுருதி இதுக்கெல்லாம் அசரல!

திடீர்னு ஒருபையன் 'லவ்'வை சொன்னா எந்தப் பொண்ணுக்குமே கொஞ்சமாவது அதிர்ச்சி வரும்! 

வரணும்! அதானே இயல்பு? கருமம்..அந்தக் கொஞ்ச நஞ்ச அதிர்ச்சிய கூட சுருதி காமிக்கல! 

ஒருவேளை இததான் 'அண்டர் பிளே'ன்னு சொல்வாய்ங்களோ?

அப்போது அவர் காட்டும் முகபாவம் 'சவசவ' அல்லது 'தம்பி டீ இன்னும் வரல' இரண்டில் எது என்பதே சினிமா ஆர்வலர்கள் ஆராய வேண்டியது!

'உன் காதலைத் தூக்கிக் குப்பைல போடு!' - இதைச் சொல்லும்போது ஒரு தமிழ்ப்பொண்ணு மாதிரியே தோணல! - ராஜீவ்மேனன் படத்தில வர்ற தமிழ் தெரியாத பொண்ணுங்க, ஆன்டிங்க சொல்றமாதிரியே இருந்திச்சு!

இருந்தாலும் எதுவுமே நடக்காத மாதிரி, நிறுத்தி நிதானமா பதில் சொல்லும் அந்தத் தேர்ந்த நடிப்பு(?!) மிக அருமை! ஆவேசப்பட்டா என்ன, கோபப்பட்டா என்ன..துக்கப்பட்டா..ஆச்சரிய...இன்னும் என்னென்ன பட்டாலும் மிக நிதானமா நிறுத்தி நிறுத்தி வசனம் பேசுறதைப் பார்க்கும்போது முருகதாஸ் என்னதான் பாத்திட்டிருந்தார்னு தோணுது! ஒருவேளை எதையாவது பண்ணித் தொலைன்னு கைகழுவி விட்டுட்டாரோ?

கஜினி படத்தில லவ் சீன்களே படத்தின் பெரும்பலம்! அதில் அசினுக்கு குரல் தனியா நடிச்சிருக்கும்! ஆனா அப்பிடியொரு படமெடுத்திட்டு சுருதி குரலைக் கண்டுக்காம...ஏன்? இதுக்குப் பேசாம டோங்லிக்குத் தமிழ் சொல்லிக் கொடுத்து டப்பிங் பேச வச்சிருந்தா நமக்கெல்லாம் பெருமையா(?!) இருந்திருக்கும்!  

ஆனா, நகைச்சுவைல பின்னியிருக்கிறார் சுருதி!

வெல்லைக்காரன் இந்தியர்களை மதிக்க மாட்டேங்குறான். தமில்ல பேசினா தமிள் நாட்டுக்காரனே மதிக்க மாட்டேங்குறான்னு உணர்ச்சி பொங்க ஸ்பெல்லிங் மிஸ்டேக்கோட பேசும்போது செம்ம காமெடி! 

எனக்கு சிப்புச் சிப்பா வந்திச்சு! அதென்ன கருமமோ கண்றாவியோ தெரியல! அவங்க எவ்ளோ சீரியஸா பேசினாலும் எனக்குச் சிரிப்பா வருது! ஆனா சிரிக்கல..அப்புறம் நமக்கு தமிழுணர்வு இல்லேன்னு பஸ்லேருந்து இறக்கி விட்ருவானுகளோன்னு பயம்! இப்பல்லாம் நம்மாளுகளுக்கு தமிழுணர்வு ரொம்ப அதிகமாயிடுச்சு!

என்னமோ அவரது வசன உச்சரிப்பு, நடிப்பு பற்றி பலர் சிலாகித்துச் சொல்லியிருக்கிறார்கள்! ஷ்பட்டமா பேசுகிறார்னு சொன்னாங்க...

எச்சூஸ்மீ..எஸ்பட்டம்னா தெளிவுதானே! அதில என்ன தெளிவைக் கண்டுட்டாங்க?

இதுவரைக்கும் நாம யாராவது தல அஜீத்தோட தமிழ் உச்சரிப்பைப் பாராட்டியிருந்தா சந்தேகமில்லாம ஸ்ருதியோட உச்சரிப்பைப் பாராட்டித் தொலைக்கலாம்!

அந்தக் குரலையும் உச்சரிப்பையும் கேட்டபோது ஒருவிஷயம் ஞாபகத்துக்கு வந்திச்சு!

நம்ம மணி சார் இருக்காருல்ல...அதாங்க படிச்சவங்களுக்காகப் படமெடுப்பாரே அவருதான்! அவரு படங்கள்ல வர்ற லேடீசைப் பார்த்தீங்கன்னா தமிழுக்குச் சம்பந்தமே இல்லாத தோற்றத்துல இருப்பாய்ங்க..ஆனா ஸ்ட்ரிக்டா தமிழ்ல டப்பிங் கொடுக்கச் சொல்லியோ என்னவோ பேசுவாங்க பாருங்க..அப்பிடியே நாக்குல குளவி கொட்டினா மாதிரி தத்தத்தான்னு! இதுல வட்டார வழக்குல வேற பேசினா அது மேலதிக கொடுமை!

எனக்கென்னவோ சுருதியப் பார்க்கும்போது ஆய்த எழுத்து படத்தில சூர்யாவோட அம்மாவா வருவாங்களே ஒரு ஆன்டி அவங்களப் பாக்குறமாதிரியே ஒரு பீலிங்! அது ஏன்னே புரியல! பாடல்களின்போது அப்பிடியில்ல..ஆனா நடிக்கும்போது அந்தம்மாதான் ஞாபகத்துக்கு வர்றாங்க!

எத்தனையோ தமிழ்ப்படத்தில எப்பிடியெல்லாமோ தமிழ் பேசறாங்க..அது பிரச்சினையல்ல! ஆனால் தமிழன் வரலாறு, தமிழன் பெருமைன்னு கூவிக் கூவி விளம்பரம் செய்த ஒரு படத்தில ஒழுங்கா தமிழ் பேச வேணாமா?

எப்பவுமே தமிழனுக்கு இன்னொரு தமிழனை விட அந்நியர்களே உதவுவாங்கன்னு சொல்றாய்ங்க நமக்கு அது பற்றித் தெரியல..ஆனா ஒரு நியூஸ் போட்டிருந்தாய்ங்க!

ஷாருக்கான் சொல்லியிருக்காராம்!

சுருதியோட வளர்ச்சியளவுக்கு தமிழ்ப்பயலுவ இன்னும் சரியா வளரல! சுருதி நடிக்கக்கூடிய அளவுக்கு தமிழ்சினிமா இப்போதைக்கு எடுக்க மாட்டாய்ங்க அதனால பாலிவுட்டுக்கு வந்திருங்கன்னு..! ஏதோ நல்லது நடந்தாச் சரி! 

தமிள் எங்கிருந்தாலும் வாளனும் வலரனும்!