தமிழ்ப்பெண்களா இப்படி?

கஜினி படத்தில் கல்பனா (அசின்) கண்தெரியாத பெரியவர் ஒருவரைக் கை பிடித்து ரோட்டைக் கடகும்போது சுற்றிவர என்ன நடக்கிறது என்பதைச் சொல்லிக்கொண்டே வரும் காட்சியை யாராலும் மறக்கமுடியாது! 

அதைப்பார்க்கும் சூர்யாவுக்கு அவர்மேல் இன்னும் மரியாதை, காதல் ஏற்படுவதுபோல அமைக்கப்பட்ட அந்தக் காட்சிக்கு ஏற்ப இசையும் சேர்ந்து ஒரு நல்ல அனுபவத்தைக் கொடுத்திருக்கும்!  அசினைப் பிடிக்காத எனக்கே ஒரு இது வந்துச்சுன்னா பாருங்க! (அந்தப்படத்தில மட்டும்!)

ஆனாலும் ஒரு விஷயம் அப்பவே தோணிச்சு! அதுவரை ஏன் இதுவரை கூட பிறருக்கு உதவும் இளம் தமிழ்ப் பெண்களை நான் பார்த்ததே இல்லை! உதவியா? உபத்திரவம் செய்யாமலிருப்பதே பெரியவிஷயம் என யாரும் சொல்லாதீங்க! 

தங்களுக்கு ஏதும் உதவி தேவையெனில் தயங்காமல் யாரிடமும் கேட்கிறார்கள். பெரும்பாலும் அதற்கு அவசியமே இல்லாமல் யாராவது சபலிஸ்டுகள் ஓடி வருகிறார்கள்! இதைவிட பார்த்ததுமே அடையாளம் காணக்கூடிய புன்னகை மன்னன்களும் நம்மிடையே பரவலாகக் காணப்படுகிறார்கள்! புன்னகைமன்னன் - இழிச்சவாயன்னும் சொல்வார்கள்!

நம்ம தமிழ்ப்பெண்கள் இப்படியெல்லாம் அடுத்தவர்களுக்கு உதவி செய்வார்களா? கண்தெரிஞ்ச ஆளுங்க ஏதாவது கேட்டால்கூட உதவி செய்வார்களா? - நான் பார்த்ததே இல்லையா அதான் இப்பிடி ஒரு சந்தேகம். 

ஆனால் அநேகமாக எந்தப் பெண்களுமே பசங்களைக் கண்டதுமே 'பீட்டர்' விட ஆரம்பித்து விடுகிறார்கள் - இதை மட்டும் தவறாது செய்கிறார்கள்! சந்தேகமேயில்லை - இதை நான் பலமுறை பார்த்திருக்கிறேன்! ஏனிப்படி? - சத்தியமாப் புரியல! 

அநேகமாக இயக்குனர் முருகதாசும் இப்படியான இரக்க குணமுள்ள பெண்களைப் பார்த்திருக்கமாட்டார். ஆனாலும் எவ்வளவு அழகா, அதீதமா கற்பனை செய்திருக்கார்னு ஒரே ஆச்சரியம்! பிரமிப்பு! - உண்மையிலேயே பெரிய விஷயம்தான் இல்லையா?

இருந்தாலும் இப்படி ஒரு பெண்ணைப் பார்க்க முடியுமான்னு அப்பப்ப கேணத்தனமா யோசிச்சிருக்கேன்.........ரெண்டு வருஷத்துக்கு முன்னாடி அமேலியைப் பார்க்கிற வரைக்கும்! 

அமேலி யாரோ பார்வையில்லாத பெரியவரை அப்படித்தான் அழைத்துச் சென்றாள். ஆனால் மிகவிரைவாக...கிட்டத்தட்ட தர தரவென இழுத்துச் செல்லாத குறையாக...! அதைவிட அவளின் பேச்சு இன்னும் விரைவாக...ஒண்ணுமே புரியல - பிரெஞ்சில் பேசியதால்!

இருபத்துமூன்று வயதான அமேலி சிறுவயதில் மற்றக் குழந்தைகளோடு சேர அனுமதிக்கப்படாமல் தனியாக வளர்க்கப்பட்டவள்! தனிமையில், ஒரு கற்பனை உலகில் சஞ்சரித்துக் கொண்டிருக்கும் அவள், பிறருக்கு உதவும் இரக்கமனமும், நகைச்சுவை உணர்வும், குறும்பு கொப்பளிக்கும் கண்களும் கொண்டவள்!

பாரிசிலுள்ள Café des 2 Moulins  இல் Waitress ஆக வேலை செய்பவள் - அப்படித்தான் சொல்கிறார்கள் படத்தில்!

2001 இல் வெளிவந்த இந்த பிரெஞ்சுப்படத்தில் அமெலியாக நடித்த Audrey Tautou (படங்களில் இருப்பவர்) - European Film Awards, Cesar Awards, BAFTA உள்ளிட்ட ஏராளமான விருதுகளைப் பெற்றுக் கொண்டார். சிறந்த நடிகைக்கான Accademy Award க்கும் பரிந்துரைக்கப்பட்டார்.

Amelie யில் அந்தக்காட்சி சென்டிமென்டலாக இருக்காது. கஜினியில் அதை ஒரு அற்புதமான காட்சியாக மாற்றியிருப்பார் முருகதாஸ்.  எனக்கு இயக்குனர் முருகதாஸை பிடிக்கும்! ஏழாம் அறிவுக்கு வெய்ட்டிங்!

கிறிஸ்டோபர் நோலனின் Memento வை சுட்டுத்தான் முருகதாஸ் கஜினி எடுத்தார் என்ற குற்றச்சாட்டு பரவலாக முன்வைக்கப்பட்டாலும், சில விஷயங்கள் தவிர அப்படிக் கூற முடியாது! ஏனெனில் Memento வைத் தமிழில் எடுத்தால் நிச்சயமாகத் தயாரிப்பாளர் 'கஜினி' ஆகி விடுவார்!

சரி இப்போ என் கேள்விக்கு வருவோம்! (மறுபடியும் முதல்ல இருந்தா?) இப்படியான தமிழ்ப் பெண்கள் இருக்கிறார்களா?