யோஹன் & Largo Winch

கவுதம் மேனன் இயக்கத்தில் விஜய் நடிக்கும் யோஹன் படம் பற்றிய அறிவிப்பு வந்த உடனேயே இப்படி ஒரு கேள்வியும் பரபரப்பாக! எனது பதிவிலும் சிலர் இதைப்பற்றி பின்னூட்டியிருந்தார்கள்! முகநூலிலும் வலைத்தள நண்பர்கள் சிலர் ஒரு வழி பண்ணியிருந்தார்கள்! எல்லாத்துக்கும் காரணம் படத்தின் போஸ்டர்தான்!

ஒரு போஸ்டருக்காக அமெரிக்க போய் படம்பிடிக்க தேவையில்லை! அதனால் பின்னணியில் கிராபிக்ஸ் துணை கொண்டு...அமெரிக்கா அது ஓக்கே! அதுவும் ஒரிஜினலில் உள்ளதையே பயன்படுத்தாமல் கவனமாக மாற்றி இருப்பது பாராட்டுக்குரியது!

ஆனால் போஸ்டரில் முக்கியமா யாரைப் பார்ப்பார்கள்? 

ஒரிஜினலா விஜய்யையே படமெடுத்திருக்க முடியாத பட்சத்தில், கோர்ட் போட்ட ஒரு விஜய் படத்தை பாவிச்சிருக்கலாம்! அதுவும் முடியாவிடில், வேறு ஏதாவது ஒரு போட்டோவில் மாத்தியிருக்கலாம்!

அதையெல்லாம் விட்டு ஒரிஜினல் போஸ்டரில் உள்ள படத்தில விஜயின் தலையையும், ஒரு கையும் பொருத்தி இருந்ததுதான் (அப்படியே தெரிகிறது கோர்ட்டின் மடிப்புகள், லைட்னிங்கில்) நம்மாளுகளின் சந்தேகத்திற்கு காரணம்! 

எப்படியோ இப்போதைக்கு போஸ்டர் உல்டான்னு மட்டும் தெரியுது! ஒருவேளை போஸ்டரில் இருந்தே ஆரம்பிக்கிறோம் என்று சிம்பாலிக்கா சொல்கிறாரா கவுதம்?

அப்படியே இருந்தாலும் கவுதம் மேனனின் ஸ்டைலிஷான மேக்கிங்கில் நல்லாவே இருக்கும்! அதைவிட முக்கியமா காப்பியாக இருக்கும் பட்சத்தில் அதை நேர்மையாக இன்ஸ்பிரேஷன்னு டைட்டிலில் போட்டு ஒத்துக்கொள்ளும் அல்லது பேட்டிகளிலாவது நேர்மை கவுதமிடம் இருக்கிறதென்று நினைக்கிறேன்!

இது ஜேம்ஸ்பாண்ட் படங்கள் போல தொடராக வர வாய்ப்புள்ளது! அப்படித்தான் முதலில் அஜித் நடிப்பதாக இருந்தபோது கவுதம் கூறியிருந்தார்.

Largo Winch

2008 இல்  வெளியான பிரெஞ்சுப்படம்! டீ.வி.சீரியலாகவும் வெளிவந்திருக்கிறது! பிரபல பெல்ஜியம் காமிக்ஸ் கதைகளான Largo Winch இனை அடிப்படையாகக் கொண்டு எடுக்கப்பட்ட திரைப்படம்! இதன் இரண்டாம் பாகம் இந்த வருடம் வெளியாகியுள்ளது!  

Largo Winch comics

1970 இல் முதலாவது அத்தியாயம் வெளிவரத் தொடங்கியது! ஆசிரியர் பிரபல காமிக்ஸ் எழுத்தாளர் Jean Van Hamme மிகப்பிரபலமான இந்த காமிக்ஸ் தொடர்கள் வருடாந்தம் ஐந்துலட்சம் விற்றதாக விக்கிபீடியா சொல்கிறது!

Jean Van Hamme

இந்தப்பெயர் மட்டும் எனக்கு முன்னரே பரிச்சயம்! நான் Largo Winch காமிக்ஸ் பார்த்ததே இல்லையென்றாலும் இவரது இன்னொரு மிகப்பிரபல படைப்பான XIII காமிக்ஸின் தீவிர ரசிகன் என்பதால்! காமிக்ஸ் பற்றிய எனது முன்னைய பதிவு இது. நீங்களும் காமிக்ஸ் பிரியரா?   

XIII comics

1984 இல் முதலாம் அத்தியாயம் வெளியானது. தமிழில் லயன் காமிக்ஸ் வெளியீடாக 'இரத்தப்படலம்' என்ற தொடராக வந்தது. சென்றவருடம்(?)  முழுத் தொடரும் ஒருபுத்தகமாக வெளிவந்துவிட்டது! ஆனால் இன்னும் என்கைக்குக் கிடைக்கவில்லை! கொழும்புக்கு இன்னும் பதிப்பகத்தார் அனுப்பவில்லை என்று சொன்னார்கள், சில நாட்களுக்கு முன்! இந்தத் தொடரின் மிகப்பெரிய வெற்றிக்கு ஓவியர் William Vance  இன் உயிர்ப்பான ஓவியங்களும் ஒரு காரணம்!