வை திஸ் கொலவெறி சமீரா? - பஸ்ல உட்கார்ந்து யோசிச்சது!

புத்தாண்டில முதல் பஸ் பயணம் அமோகமா வெடியோட ஆரம்பிச்சுது! அதாவது பஸ்ல வெடி காவியத்தைப் பார்க்க நேர்ந்தது!

சமீரா ரெட்டி - விஷாலைவிட வாட்டசாட்டமா இருந்தாங்களா, அப்பத்தான் தோணிச்சு, உண்மையிலேயே விஷாலின் தங்கச்சி காரெக்டருக்கு சமீராதான் பொருத்தம்னு. ஹீரோயினா சமீரா...பேசாம விஷாலே நடிச்சிருக்கலாம்!

வாரணம் ஆயிரம் படத்தை தனித்தனியா சிறு சிறு காட்சிகளாக எனக்கு மிகப் பிடித்திருந்தது. அவ்வளவு அழகான காட்சியமைப்புகள் அதில் சமீராவும் அழகாக இருந்ததில் ஆச்சரியமில்லை. அதை நம்பி? 

அசல் படத்தின் பல சிறப்பம்சங்களில்(?!) சமீராவுக்கும் தனியிடம் உண்டு!

சமீராவை 2000 ஆண்டில் சிட்டிசன் படத்தில் நடிப்பதற்கு அழைத்து வருவதாகப் பேச்சிருந்தது. அது நடக்கவில்லை. ஆனால் இவ்வளவு வருஷம் கழிச்சு 'வாரணம் ஆயிரம்'  மூலமா தமிழ் நாட்டுக்கு வருவாரென்று அவரே நினைத்திருக்கமாட்டார். ஒருவேளை இதைத்தான் விதி வலியது என்று சொல்லுவாங்களோ? சில விஷயங்களை கொஞ்சம் தள்ளிப் போடலாம்! ஆனா முழுசா தப்பிக்க முடியாது!

சமீரா சிரிக்கும்போது கூட அட்ஜஸ்ட் பண்ணிக்கலாம். ஆனா வெட்கப்படும்போதுதான் ஓடுற பஸ்லருந்து குதிச்சிடலாம் போல இருந்திச்சு!   

அதென்னமோ தெரியல! வெடில சமீராவைப் பார்க்கும் போது நம்ம பொன்னம்பலம் ஞாபகம் வந்திச்சு! நல்ல நடிகர் இப்போ காண முடியிறதில்ல!

அப்புறம் ஒரு விஷயம் ரொம்ப ஆச்சரியமா இருந்திச்சு! விஷாலுக்கும் எனக்கும் இருக்கிற ஒரு ஒற்றுமை! என்னன்னா ரெண்டு பேருக்குமே பஸ் பிரயாணம் ஒத்துவருதில்ல! அதில பாருங்க நான் பஸ்ல போனா எனக்கு மட்டும்தான் கொடுமையான அனுபவமா இருக்கு! ஆனா விஷால் பஸ்ல ஏறிப்போனா நம்ம எல்லாருக்குமே...

புது வருஷத்திலயாவது விஷால் பஸ்ல ஏறி அடுத்த ஊருக்குப் போறதை நிறுத்திட்டா நம்ம எல்லாருக்குமே நல்லது! நாங்களும் எவ்வளவுதான் தாங்குறது?

அதையெல்லாம் விட முக்கியமா ஒண்ணு தோணிச்சு! சமீரா ரெட்டி ஏன் ஹீரோவா நடிக்கக்கூடாது? ரொம்ப நல்லாயிருக்கும்னு நினைக்கிறேன். ஆண்கள் மட்டும்தான் பெண்வேஷம் போடணுமா? பெண்கள் ஆண்வேஷம் போடக்கூடாதா? அப்பிடின்னா அது ஆணாதிக்கம் இல்லையா?

ஜீ பெண்களை மிகவும் மதிப்பவன்,அன்பு அக்கறை,மரியாதையை கொண்டவன் என்ற வகையில் இந்தக் கேள்வியை சமூகத்தை நோக்கிக் கேக்கிறான்! நல்லா பாத்துக்குங்க! நம்மளுக்கும் சமூக அக்கறை இருக்கு!

********

நேற்று தெஹிவல - வெள்ளவத்தை பஸ்ல போகும்போது, பக்கத்தில இருந்த ஒரு சிங்கள அங்கிள்/தாத்தா அரசியல் பேச ஆரம்பிச்சார். தமிழ்ல அரசியல் பேசினாலே பாதி புரியாது. இதுல எனக்கு சும்மாவே சிங்களம் தெரியாது! ஆனா அவர் ரொம்ப நல்லவர். என்னை எதுவுமே கேக்கல! தானே தொடர்ந்து பேசிட்டு!ஒருவேளை இளமைக் காலத்தில மேடைப் பேச்சாளரா இருந்திருக்கலாம். 

நானும் வலிக்காத மாதிரியே பொத்தாம் பொதுவா 'ஸ்மைல்'லயே 'அருமை' கமென்ட் போட்டுட்டு, இறங்கி ஓடிட்டேன்! ஏழு மணித்தியாலப் பயணத்தில்தான் படுத்திராங்கன்னா, இப்பல்லாம் பத்து நிமிஷ பஸ் பயனத்திலுமா? ஆளாளுக்கு கொலவெறியாத்தான் அலையுறாங்க போல! 

*********

வை திஸ் கொலைவெறி ஹிட் ஆனதும் ஆச்சு! அதன் தொடர்ச்சியா நம்மாளுங்க பண்ற அலப்பறை இருக்கே...அதாவது தமிழை உலக வரலாற்றில முதன்முறையா கொலை பண்ணிடாங்களாம்! அதை கண்டிக்கிறாய்ங்களாம்! அதுக்கும் அதே பாட்டோட மெட்டுத்தான் தேவைப்படுது! முகப்புத்தகத்தில ஷேர் பண்ணி ஷேர் பண்ணி தமிழுணர்வைக் கொலைவெறியாக் காட்டுறாய்ங்க!     

அரைகுறைகளின் அலப்பறைகளைப் பார்க்கும்போது, 'நாராயணா இந்தக் கொசுத்தொல்லை தாங்க முடியலடா!'