ஏழரை!

ஏழரைக்கும் எனக்கும் காலங்காலமா அப்பிடியொரு பந்தம்! அது எப்பிடின்னே தெரியல! இப்போ இன்னும் ஓவராயிடுச்சு!


இப்பல்லாம் நான் காலைல மணி ஏழரைக்குத் தான் தூக்கம் கலைந்து எழுந்திருக்கிறேன் என்றால் பார்த்துக் கொள்ளுங்க!

அதில பாருங்க சும்மாவே எனக்கு எப்போதும் ஏழரைதான்! இந்த கொடுமைல இப்போ உண்மையாவே ஏழரைச் சனி நடக்குறதா ரெண்டு வருஷத்துக்கு முதல் வீட்டில சொன்னாங்க. எனக்கு இதிலெல்லாம் பெரிசா நம்பிக்கை இல்லாதிருந்தாலும் போன வருஷம் முழுக்க ரொம்ம்ம்ப அடிபட்டுட்டதால (சும்மா இல்ல..செம்ம) அப்பிடித்தானோன்னு இப்பவும் குழப்பமா யோசிக்கிறேன்!

இருந்தாலும் இதுக்கு மேல என்ன நடக்கப் போகுது? நாம பாக்காத கலவரமா, வாங்காத அடியா விட்றா விட்றான்னு ஒரு கெத்தோட நாம பாட்டுக்கு போயிட்டிருந்தாலும், யாராவது வலியக் கூப்பிட்டு.... 

நம்ம ரெசிடென்சுக்கு எதிர்ல இருக்கிற கடை ஓனர் அங்கிள் இன்னொருத்தரோட ஏழரை பற்றி ஏதோ சொல்லிட்டிருந்தாரா நம்மளைப் பார்த்ததும் தம்பி என்ன ராசி? (எப்புடித்தான் கண்டு பிடிக்கிறாய்ங்களோ?) சொன்னேன்.

உடனே சந்தோஷமா 'உங்களுக்கு ஏழரை முடியப்போகுது'ன்னு சொல்லி கூடவே ஒரு குண்டைத் தூக்கிப் போட்டார்.

'ஏழரை முடியும்போது ஒரு வழி பண்ணிட்டுத்தான் போகும்...அது வரைக்கும் கவனமா இருங்க தம்பி!'. 

(அவ்வ்வ்வ்!)

அதுவரைக்கும் பேசாம இருந்த ஒரு ஆன்டி சம்பந்தமேயில்லாம ஒரு அட்வைஸ் குடுத்தா பாருங்க 

'ஓமோம் பிரயாணம் செய்யும்போது கவனமா இருக்கவேணும்...அதுவும் காலை பத்திரமா பாத்துக் கொள்ளவேணும்! அங்கதான் கூடத் தாக்கும்!'

(அடப்பாவீங்களா.....?)

வாரத்தில் இரண்டுநாள் நான் சொகுசு பஸ் பிரயாணம் ஊருக்கு (கொழும்புக்கு)

செய்வது அந்தக் கடைக்கார அங்கிளுக்குத் தெரியும்! ஆனா அந்த யாரோ ஒரு ஆன்டிக்கு? என்னை முன்ன பின்ன தெரியாதே! அப்புறம் ஏன் இந்தக் கொல வெறி? 

அதென்னவோ தெரியல தாய்க்குலங்களுக்கு எல்லாம் பார்த்த உடனேயே நம்ம மேல அப்பிடி ஒரு அன்பு!

விடுறா ஜீ இதெல்லாம் உனக்குப் புதுசான்னுட்டு அன்னிக்கு இரவு நான் பாட்டுக்கு பஸ்ல ஏறி உட்கார்ந்து, மொக்கை படத்தை பாக்காம கஷ்டப்பட்டு, ட்ரை பண்ணி, நல்லா தூங்கிட்டேன். 

கிறீச்னு ஒரு சத்தம் (பிரேக்!) நெத்தியில வலி! முன் சீட்டுல அடிபட்டு! எல்லாரும் பேஸ்தடிச்சு, முழிச்சுட்டே உட்கார்ந்திருந்தாங்க!

அப்புறமா இறங்கிப் பார்த்தா பஸ்ல முன்பக்கத்தில ஓடு வெடிச்ச, அவிச்ச முட்டை மாதிரி இருந்திச்சு! சொகுசு பஸ் எல்லாமே அவ்வளவா ஸ்ட்ராங் இல்லாமல் முட்டை மாதிரித்தான் தோன்றுகிறது! அப்படிப் பார்க்கப் போனா நம்ம நாட்டின் சாதா பஸ்ஸான லங்கா- அசோக் லேலான்ட் தான் உறுதியா தெரியுது. ஆனா அவங்களோட சொகுசு தயாரிப்பும் முட்டை மாதிரியேதான் தோன்றுது. ஆனா என்ன அடிபட்டா டிரெய்னே பிச்சுக்குது பஸ் எங்கே...!

ம்ம்ம்...எதுக்கும் சீட் பெல்ட்டைப் போட்டுட்டு தூங்குறது நல்லதோ? அப்படியே செய்தேன். ரெண்டு நாள்தான் அப்புறம் எல்லாத்தையும் வழக்கம்போல மறந்துட்டேன்.

அனாலும் நம்ம ராசி விடுமா? நேற்று எங்கேயும் எப்போதும் பார்த்து தொலைச்சிட்டேன்! கிலியாகிப் போய் இருந்ததால இரவு பஸ்ல ஏறி சீட்ல உட்கார்ந்ததும் சீட் பெல்டைத் தேடினா....அந்த பஸ்ல சீட் பெல்டே இல்ல! என்ன கொடுமை இது?

ஆனா ஒண்னு படம் சூப்பரா இருந்திச்சு! கூடவே அஞ்சலியும் ஹி! ஹி! ஆனா அதுக்கப்புறம் பஸ்ஸை பார்த்தாதான் பீதியா இருக்கு!