ஆன்டி & பூச்சாண்டி!

'எப்பவுமே முகப் பூச்சு ஓவரா பூசிட்டு திரியிற ஆன்டிங்களைப் பூச்சாண்டிகள் என கூறலாமா?'

பல பூச்சாண்டிகளை அன்றாடம் சந்தித்தாலும், கடந்த ஞாயிறு பேரூந்தில் எனக்குப் பக்கத்தில இருந்த ஆன்டியைப் பார்த்தபோதே இந்தக் கேள்வி எழுந்தது! பொதுவாக ஆண்கள் பக்கத்தில் பெண்களை உட்கார விடுவதில்லை! ஆனால் சில சமயங்களில் ஆன்டிகளை உட்காரவைக்கும் அபாயம் இருக்கிறது!

சமீபகாலமாக சமீரா ரெட்டியின் 'காவியங்களின்' குறுக்கீடு இல்லாமல் எனது பயணங்கள் ஓரளவு சுமுகமாகிவிட்டிருந்த நிலையில் பக்கத்திலிருந்து ஆன்டி மிரட்டிக் கொண்டிருந்தார்.

மேக்கப்பு என்கிறதே மானவாரியா மூஞ்சில அப்புறதுதானே? என அப்புராணியாக் கேக்கிற பொண்ணுங்க நம்ம நாட்டில ஏராளம்! அதுங்களைச் சொல்லிக் குற்றமில்லை. 

அஞ்சாப்புப் படிக்கும்போதே வெளிநாட்டில இருக்கிற அப்பன்காரன் மேக்கப் செட்ன்னு ஒண்ணு அனுப்பி வைப்பான். அடுக்கடுக்கா, கலர் கலரா, விதவிதமான பிரஷ்களோட! (இதை வாட்டர் கலரா யூஸ் பண்ணலாமான்னு நாங்க வேற அப்பவே அறிவு பூர்வமா சிந்திச்சிருக்கம்!)  அதில பொண்ணுக்கு சம்பந்தமில்லாத கலர்தான் அதிகமிருக்கும். அப்புறமென்ன டியூஷன், கல்யாணவீடு, கோவில் திருவிழா எல்லாம் பொண்ணு சும்மா பாப் சிங்கர் கணக்கா பப்பரப்பான்னு போய்க் கலவரமாக்கும்!இதில சில அம்மாக்களும், பொண்ணுங்களோட சேர்ந்துகொள்வது மேலதிக கொடுமை!

இப்பிடியாப்பட்ட மண்ணில பிறந்தவய்ங்க, வளர்ந்தவய்ங்க மெதுவாத்தான் மாறுவாய்ங்க! இவ்வளவு ஏன்? மொத மொதல்ல Fair Ever வந்தப்போ ஓடிபோய் வாங்கி ஒரு டியூபை பூரா ஒரே தடவைல மூஞ்சில அப்பினது யாரு...நம்ம பயலுகதேன்!

'நம்மள மாதிரி சமுதாய அக்கறை கொண்ட' பதிவர்கள்தான் அவங்களுக்குச் சொல்லிக்கொடுக்கணும்! கொஞ்சம் கொஞ்சமா மாத்தணும்!-இல்லையா? அதாலதான் சொல்றேன் வேறொண்ணுமில்ல! 

இதெல்லாம் எனக்கென்ன பெருமையா? ......கடமே!

நம்ம நாட்டில மணப்பெண் அலங்காரம்னு ஒண்ணு வச்சிருக்காங்க பாருங்க அது மாறுவேஷப் போட்டியின் ஒரு மாறுபட்ட வடிவம்! அலங்காரம் முடிஞ்சதும் பொண்ணு வீட்டுக்காரங்களுக்கே அடையாளம் தெரியாது. இதுல மாப்பிள்ளை வேற 'நான் பாத்த பொண்ணு எங்கய்யா?', 'ஒரு வேளை ஆள்மாறாட்டம் பண்ணி ஏமாத்திட்டாங்களோ'ன்னு கன்ஃபியூஸ் ஆகி முழிக்கிறது கண்கொள்ளாக் காட்சி!

ஆனாலும் இந்த ஆன்டிகளின் அலப்பறைதான் தாங்க முடியல!

வயதுக்கு, கலருக்கு சற்றும் சம்பந்தமில்லாமல் அள்ளி மேக்கப் போடுபவர்கள், கறுப்பா இருந்திட்டு கண்களுக்கும் புருவத்துக்குமிடையே ரோஸ் கலர் பெயிண்ட் அடிப்பவர்கள், இருபத்தைந்து வயதில் தைத்த ஆடைகளையே நாற்பது வயதிலும் டபுள் சைஸ் ஆனபின்பும் கொள்கைப் 'பிடிப்புடன்' விடா முயற்சியுடன் அணிந்துகொள்பவர்கள் அல்லது மகளின் ஆடைகளை அணித்து வருபவர்கள், பசங்களைப் பார்த்து அநியாயத்துக்கு வெட்கப்பட்டு தற்கொலை எண்ணத்தைத் தோற்றுவிப்பவர்கள்  -  இவர்களுக்கெல்லாம் கருட புராணத்தில் ...ச்சே ஒரு  ஃப்ளோல வந்திட்டுது!

இவர்களெல்லாம் 'நானும்' என்ற பிரிவிற்குள் அடங்குவார்கள்!

'நானும்!' -அது சில வருடங்களுக்கு முன் எனது நண்பனொருவனும், நானும் மட்டுமே பாவிக்கும் ஒரு ஸ்லாங்! அநேகமாக இப்படிச் சொல்வான் - 'அவவும் ஒரு 'நானும்' டைப்தான்!'

இந்த 'நானும்' என்ற சொல்லாடலுகான பொருள் பற்றி பேசிக் நாங்கள் கொண்ட தில்லை. ஒரு ஆன்டியின் மனதின் குரலாக 'நானும் இருக்கிறேன்', 'நானும் யூத் தான்!',  'என்னையும் சைட் அடிங்க!',  'நானும் இன்னும் form ல தான் இருக்கேன் என்னையும் ஆட்டத்தில சேர்த்துக்குங்க!' - இந்த மாதிரியாகப் பொருள் கொள்ள முடியும்!

நானும்! - எங்கே நீங்களும் இனிப் பயன்படுத்திக்கொள்ளுங்கள்!  - ஏதோ தமிழ் கூறும் நல்லுலகிற்கு என்னாலான சேவை!

* * * * * * *

WAR OF THE RING!

பொதுவாக எனக்கு இப்படியான படங்களில் அவ்வளவாக ஆர்வம் இருந்ததில்லை.  LOTR படங்களில் Return of the king மட்டுமே ஒருமுறை பார்த்திருக்கிறேன். ஆனால், கருந்தேள்ஜியின் War Of The Ring மின்புத்தகம்  டவுன்லோடியதும் அசந்து போனேன். அசுரத்தனமான உழைப்பு என அவர் கூறியதன் அர்த்தம் புரிந்தது. சும்மா அப்பிடி இருக்கு!

மேலோட்டமாக மேய்ந்ததில், படத்தில் பயன்படுத்திய டெக்னிக் பற்றி டீப்பா எழுதியிருந்தார் ( அவர் பதிவுகள் எல்லாமே அப்படித்தான் ஆராய்ந்து எழுதப்பட்டிருக்கும் என்பதால் அதில் ஆச்சரியமேதுமில்லை!) 

உதாரணமா Return of the king படத்தில் என்றுதான் நினைக்கிறேன். ஒரு எரிந்து கொண்டிருக்கும் ஒரு சிதைக்கு முன்னால் வேகமாக ஒரு குதிரை வந்து சடன் பிரேக் அடிக்க, மேலிருந்தவன் சிதைக்குள் போய் விழும் காட்சி எப்படி எடுக்கப்பட்டது என விளக்கப்படங்களுடன்! - முடிவு பண்ணிட்டேன். புத்தகத்தை முழுமையாகப் படித்து, படமும் பார்த்துவிட வேண்டுமென்று!

'திரைக்கதை எழுதுவது இப்படி' எப்ப வரும்னு ஆவலாயிருக்கிறேன்!